27.03.2025
1 daqiqa
"Navoiyshunoslik" fanidan ochiq dars tashkil etildi
Navoiy innovatsiyalar universiteti "Filologiya va tillarni o'qitish" kafedrasining O'zbek tili ta’lim yo‘nalishi 3-kurs 1-guruh (sirtqi ta'lim) talabalari uchun filologiya fanlari bo'yicha falsafa doktori, PhD Sharipova Nigora Nuriddinovna tomonidan "Navoiyshunoslik" fanidan "Lison ut-tayr" dostoni va unda ilgari surilgan masalalar" mavzusida ochiq dars tashkil etildi.
Dars davomida 2025-yilning viloyatimizda "Alisher Navoiy yili" deb e'lon qilinishiga alohida urg'u berilib, Hazrat Alisher Navoiy ijodining umumbashariy ahamiyati, "Lison ut-tayr" dostonining ma'rifiy-irfoniy mohiyati, poetik-struktur qurilishi, mazkur dostonning shoir olti dostoni ichida o'ziga xosligi, "Olloh-Olam-Odam" talqinidagi hikoyatlari tahliliga e'tibor qaratildi.
Dostondagi yetti vodiyning tasavvuf tariqatlari bilan uzviy aloqadorligiga munosabat bildirilib, undagi qushlar, Hudhud, Semurg' obrazlarining tasavvufiy talqinlari xususida fikr bildirildi. Ochiq dars zamonaviy texnologiyalar asosida "Tezkor savol-javob", "Fakt-reportaj", "Detal-timsol", "Notiqlik minbari", "Zakovat quiz" - "Tasavvur va tafakkur" metodlari orqali tashkil etilib, talabalar faolligi oshirildi. Bahs-munozaralar, savol-javoblar orqali mavzuga chuqur yondashildi.
Ochiq dars mashg‘ulotida professor-o‘qituvchilardan kafedra dotsenti A.Aslonov, f.f.f.d, PhD N.G'ulomova, p.f.f.d. PhD M.Sanoyeva, f.f.f.d, PhD R.Fayzullayeva, f.f.f.d. PhD N.Kobulova, f.f.f.d. PhD F.Rajabov, katta o'qituvchilar D.Kodirova, R.Biksaliyeva, D.Sharipovalar ishtirok etishdi.