05.03.2025
1 daqiqa
BAXTIM SHUL, O‘ZBEKNING ZULFIYASIMAN!
Joriy yilning 28-fevral kuni Navoiy innovatsiyalar universitetida Filologiya va tillarni o‘qitish kafedrasi tomonidan Oʼzbekiston xalq shoirasi, taniqli jamoat arbobi, xalqaro tinchlik uchun kurash jarchisi, vafo va sadoqat timsoli Zulfiya Isroilova tavalludining 110 yilligi tantanali nishonlandi.
Tadbirda kafedra professor-o‘qituvchilari, ijodkor talaba-yoshlar hamda adabiyot ixlosmandlari ishtirok etishdi. Badiiy kechada Zulfiyaxonim qalamiga mansub begʼubor yuraklardan otilib chiqqan goʼzal sheʼrlar jarangi dillarga xushnudlik bagʼishladi.
Sahnada Hamid Olimjon va Zulfiyaxonim siymolari gavdalantirilib, ular qalamidan toʻkilgan sheʼrlar asosida kuylangan taronalar jonli ijroda kuylandi. Tadbir kuy-qoʻshiqlar va nafis raqslar bilan davom etdi. Shuningdek, tadbirda Oʼzbekiston Yozuvchilar uyushmasi aʼzosi, f.f.f.d. Raʼno Fayzullayeva Zulfiya Isroilova hayoti va ijodi haqida toʼxtalib, shoira xotirasiga bagʼishlab yozgan sheʼrini oʼqib berdi.
Badiiy kecha soʻngida esa Filologiya va tillarni oʻqitish kafedrasi mudiri, professor Kadirov Kamol Namozovich Zulfiyaxonim ijodiga oʻz munosabatini bildirdi va tadbir ishtirokchilariga tashakkur izhor etib, ularga esdalik sovgʻalar ulashdi.